Аляксандр Лукашэнка абяцаў Дональду Трампу вызваліць паўтары тысячы зняволеных. Сярод іх павінен быў быць Мікалай Статкевіч.
Я не бачу тут 1400 вызваленых палітвязняў.
Акрамя таго, я не бачу Мікалая Статкевіча, які павінен быў бы выступаць тут па відэасувязі з Мінска.
Тое, што Мікалая Статкевіча не вызвалілі, азначае, што ўсе дамоўленасці сарваныя. Атрымліваецца, што Аляксандр Лукашэнка плюнуў у бок амерыканскай дэмакратыі і асабіста ў бок Дональда Трампа. Ці можна такое дараваць?
Я хацеў бы выказаць падзяку Міністэрству замежных спраў Літоўскай Рэспублікі за тое, што яно праводзіць узважаную і прагматычную палітыку. За тое, што міністр замежных спраў Літвы заявіў: нават калі ўсе палітвязні будуць вызваленыя, санкцыі не павінны быць знятыя. Нават калі ўсе палітвязні выйдуць на волю, Беларусь застаецца таталітарнай краінай, якая падтрымлівае нацысцкі рэжым у Расіі і падтрымлівае агрэсію і генацыд украінскага народа. Гэта вельмі правільна.
Мікалай Статкевіч цяпер знаходзіцца невядома дзе. Некаторыя кажуць, што нібыта ў Гродзенскай турме. У Гродзенскай турме вельмі дрэнна з медыцынай. Там яе практычна няма, як мне казалі. Я сам там быў толькі праездам, але ўсе, хто там быў, кажуць, што там проста жах з медыцынскім абслугоўваннем. Як і ўвогуле ў беларускай турме.
Алесь Пушкін не выпадкова памёр у Гродне. Ён туды ехаў, я яго бачыў. Ён быў абсалютна здаровы чалавек. Праз некалькі месяцаў ён памёр ад прабадной язвы.
Чаму? Таму што яму проста не аказвалі дапамогу! Ён там ляжаў на падлозе, стогнаў, а доктар казаў, што ён сімулюе. Гэта забойства.
Тое ж самае можа здарыцца з Мікалаем Статкевічам. Калі ён у Гродне, у нейкай іншай турме — гэта можа здарыцца ў любым месцы. У яго не вельмі добра са здароўем. Таму неабходна, каб усе, хто можа паўплываць на рэжым Лукашэнкі, зрабілі гэта і прасочылі, каб ён:
— па-першае, атрымліваў медыцынскую дапамогу
— па-другое, быў неадкладна вызвалены, як гэтага патрабуе Дональд Трамп ад Аляксандра Лукашэнкі.
About The Author
